"سامی" قشقایی نینگ بویوگ شاعیری
موسي خان كشكولي كي "سامي" تخلص ائديرميش قاشقايي نينگ بويوگ شاعيريدير كي آزتر اونو شعر عرصه سينده تانيراگ. بو سببه كي سامي اوزو ایسته مه میش شاعير سويله نه و دفتريني هامي كيمسه دن گيزلهميش و اوز زامانيندا كيمسه اونونگ شاعيرليگيندن و شعر دئدیگيندن خبر يوخويموش. اونونگ شعرلريني اوخويانلار بيللر كي سامي بير بويوگ عاشيق و عاريف دير.
"موسي خان بير آد و سانلي خانواده ايچينده دونيايا گوز آچميش (1285 تا 1280قمري). آتاسي (عباسعلي خان) كشكولي كلانتري ايمش. موسي خان كشكولي "شاختايي" سبكينده شعر دئميش. او زاماندا آرتيق بو سبك ايشلنيرميش. بو شاعير 1325 تا 1330 قمري ايلينينگ آراسيندا دونيادان گوز كسميش. بو شعري "سامي" ديوانيندان (كي اوز ال يازماسي و گوزهل خطي اينان وار و هلز ساخلانميش) انتخاب ائديب و سيزينگ ایچون بوردا يازميشام. البته موسي خان سامي بيليرميش بير گون شعرلريني اوخولار و روحونا درود وئريللر. بير داهي زاماندا بو شاعيري تانيماگ ايچون اوندان آرتيق تر يازارام. سيزده اگر بو شاعيردن مطلب و يا سوز وارينگيز منيم ايچون يازينگ... بو شعري اوخويونگ.
واعظا عاشقلري هر دم نچون منع ائيلارانگ
گوز قارا قاشلار كمان بو وحشي جئيراني گورونگ
صورتي اسلاميني بير خال كافر تك دوتوب
اي مسلمانلار گلينگ بو كفر و ايماني گورونگ
جان آلاندير تير مژگان جان وئرندير لبلرينگ
جان و جاناندير اوزونگ بو جان و جاناني گورونگ
بير خالينگ كشورستاندير روم اقليمين آليب
سلطنت تختينده يا رب جاه و سلطاني گورونگ
گوزلرينگ قي باخماقي هر دم منيم جانيم آلير
قاش كمان كيپريگي اوخ بو چشم مستاني گورونگ
عهد و پيمان باغلاديم يار ساچينينگ هر تارينا
تا وارام سينديرمهزم بو عهد و پيماني گورونگ
وعده وئردينگ غم يئمه "سامي" طبيب دردينگم
درد و غم آرتيق اولوب بو ترسه ديواني گورونگ
سامي جوانليق عالميندا بير قاشلاري كمان و گوزلري قارا گوزهل معشوقه يه مايل اولور و اونونگ عشقي اوتو شاعري تا وار يانديرير و چون سئوديگي قيز اونا فاميل دير و ياخين، سئوميش بو پنهان سئودا گيزلنتي قالا وفاش اولمايا. ائله بو دليله اونو آز كيمسه لر شاعير تانيللار و بو مصافدا اونونگ آديني يوخوموش...