قاشقايي فرهنگينينگ ائلچي لري
بوگون دونيا، اينسان لار چاليشمالاري و بيلگيلري دونياسي دير. هر كيمسه اوز دوويرونه مرز چئويره و اوزونو كيمسه لردن آيورا، وارليقي ايچون شك ائدينگ. چون كي بيلمگ و اوگرنمگ و بيلديرمگ اينسانلار روحونونگ يئمئگي دير.
بيزيم ائل (قاشقايي)، تورك دونياسيندا بير آدوسانلي و بويوگ ائل دير. بو آد و سان و بويوگ لوگ راحت و آسان اله گلمه ميش. دوغرولوگا چوخ كيشيلر و چوخ قهرمان لار و چوخ هونرمند لر و چوخ خاتون لار تلاشي و زحمتي و آثاري بو آدي و بو يئري دونيادا بيزيم ايچون آچميش. پس آتالار و آنالار زحمتيني و اومودونو بو مرزلر آراسيندان چاخارداگ و دونيايا تانيديراگ. ايندي بو تهمين بيزيم بويندا دير.
بير هفته موندان گئچميش، قاشقايي نينگ بويوگ يازاري و آراشتيرماسي "اوستاد اسدالله مرداني رحيمي" و بويوگ شاعيري و چالگيسي (سيتار) "ارسلان ميرزايي" كي هر بيري بير بويوگ بيلگين دير، توركيه دانشگاه لارينينگ دعوتي اينان او كشوره سفر ائدديلر و موزيك و ادبيات فئستيواليندا حاضير اولدولار و ائله كي خبرلر وار اونلارينگ هونرلريندن و ارائه وئريلن آثارلاريندان چوخ استقبال اولونموش.. بو مسئله قاشقايي فرهنگي ايچون بير بويوگ اتفاق دير. بو سفر ايچينده ايكي سود و فايدا وار: بيرينجي فايدا قاشقايي فرهنگي و هويتي مرزلردن گچير و تورك دونياسيندا آرتيخ تر تانيديرماگ اولونير و ايكينجي فايدا هونرمندلر و اوستادلاريميز ايچون دير كي دونيادا توركلر اونلاري اينان تانيش اولارلار. دوروستلوگدن اوستاد مرداني و ميرزايي بيزيم ائلينگ ائلچي سي دوروموندا، فرهنگ و هونر آپاريب و آدوسان گتيريبلر.. گئنه ده سفرلر اولسون و اونورلار گلسين. بو باشارما، اونلارا و قاشقايي خالقينا موبارك اولسون...