ائل قوپاردان شاد نغمه لر واي اولدو
ياز دونيادان بيزه خزان پاي اولدو
اوستاد محمد حسين كياني، قاشقايي نينگ بويوگ ايرچي سي و موسيقي بيله ني بو دونيادان گوز كسدي و جنت قوشو كيمين بهشت گولزاريني ياد ائديب گئتدي.
اوستاد كياني بير قرن قاشقايي شادليقيندا و غمينده ائل قراقيندا واريدي. اوستاد كياني موسيقي هنرمندلرينينگ نئچه نسليني بيبيره وصل ائدميشدي. محمدحسين كياني، اوستاد داوود نكيسا و اوستاد سليمان و اوستاد هادي نكيسا زامانيندا و بو اوستادلار مكتبينده بئسلنميش و سورادان اوستاد حبيب خان گرگين پور و فرود خان و فرهاد خان قراقيندا داياق ايميش. اوستاد كياني گچن ايكي دهه ايچينده جوان لار و موسيقي اينن چاليشان لارا بير بويوگ بلدچي و يول بيلن ايدي و هميشه جوانلار قراقيندا اونلارا انگيزه وئرميش دير. دوغرو سوز بو دور كي اوستاد كياني قاشقايي نينگ و حتي هامي تورك لر آراسيندا كي روايت لري ياخچي سويلردي و اونو گوزه ل سسي اينن ايرلاردي. قاشقايي لار بيلرلر كي اوستاد كياني "اصلي و كرم"، "غريب و صنم" و "محمود و نگار" داستان لاريني نه گوزه ل ائحساسلي اوخوردي كي هلز قولاقلاردا گوزه ل سسي دولانير و اوره گ لرده هلز يئري وار و يادي تا زامان وار ديري قالار....
بو بويوگ اوستادينگ اولمه گي محترم خانواده سينه، قاشقايي نينگ هنرمندلرينه و موسيقي بيلن لرينه تسليت اولسون. تاري اونو رحمت ائله سين.
يادي گوينلرده ديرري قالار.