استاد مردانينينگ ده يرلي "آتالار سوزو" كيتابي توركييه كشورينده ده چاپ اولونير
ضرب المثل لر قووملار و ديللرينگ اصلي ترين هويتي دير. من بونا اعتقاديم وار كي ضرب المثل لر عومورو ائله هر ديلينگ قدمتي و عوموروچاز برابر دير. ضرب المثل لر (آتالار سوزو) هر ديلده آتالار و آنالار سوزو دير كي نه بير شخص و نه بير زاماندا دئييلميش بلكه زامان گچميش، تجربه لر ييغيلميش، بير پارا مسائيل لري و واقعيت لري درك ائدميش لر، بير اصل كيمين قبول اولونموش و نسللر اونو نقل ائديب و زنجير وار داهي نسللره ائتيدرميشلر. پس آتالار سوزو عمرو اوزاق دير و ائله ديل تاريخي نينگ اوزاقينا.
"آتي آت يانينا باغلاسانگ هم رنگ اولماسا هم خوي اولار"
بو مثل تعبيري بو دير كي هم نشين و يولداش بيربيردن تاثير دوتارلار و ائله چوخ تاثير كي اگر هم رنگ ده اولدولار تعجبي يوخودير "هم رنگ اولماسا هم خوي اولار" چون كي ايكي يولداش بو قدر باشارير بيربيره موثر اولا.
آتالار سوزو باشارير هر ديلينگ دوامينا و قالماقينا و وارليقينا بير اصلي دليل اولا.
"آتالار سوزو ائليميز گؤزؤ"
پس گلينگ تا ديليميز وارليقي و دوامي ايچون آتالار سوزونه ارزش بيلگ.
اون اييل موندان ايلري ائليميزينگ بويوگ اوستادي آقاي اسدالله مرداني، نئچه ايلينگ زحمتيني بير كيتاب قاليبينده چاپا ائتيردي كي اونونگ آدي "آتالار سوزو" ايدي. بو كيتابينگ چاپ اولماگي، قاشقايي ادبياتي ايچون بير بويوگ قوللوق اولوندو. استاد مردانييي هامي كيمسه لري كي ادبيات و هونرينن چاليشماگ وارلاري تانيرلار و بو بويوگ استاد بو كيتاب دان آيري دا نئچه ارزشلي و بويوگ ادبي و تحقيقي كيتاب، قاشقايي ادبياتي و ديلي ايچون يازميش و چاپا ائتيردميش كي حقدن 30 ايل ارزشلي عمروندان تحقيق و مطالعه و يازماگ ايچون وقف ائدميش. آساناك لار- زبان تركي قشقايي و شيوه نگارش آن – مكالمه زبان تركي قشقايي و هامي دان ارزشلي تر و ده يرلي تر قاشقايي سوزلوگو (فرهنگ زبان تركي قشقايي) و داهي مقاله لر و تحقيق لري كي بو زمينه ده ائدميش لر استاد مرداني نينگ آثاري دير. اولا كي قدردان اولاگ و قدرشناس.
استاد مرداني نينگ آثاري نه فقط قاشقايي توركلري ايچينده استفاده اولونير بلكه ايران توركلري ده بو كيتابلاري استفاده ائديرلر و اونلار ايچون ده بير مرجع دير و حتي دونيادا بو تحقيق لرينگ انعكاس واري و تاثير. تازاليگدا بير خبر بيزه چاتدي كي استاد مردانينينگ "آتالار سوزو" كيتابيني توركييده بير تورك ادبياتينينگ بيلينجي سي (دانشجو) توركيه نينگ لاتين الفباسينه دوندرير تا باشارا بو ديله و بو الفبايا چاپ ائده و اونو توركيه خلقي ده مطالعه ائده بيله. بو اتفاق بير بويوگ افتخار دير اول استاد مرداني ايچون و سونگدان دا قاشقايي خلقينه. تورك دونياسيندا داهي مرزلر آرادان گئدير و هونر و ادبياتي مرز تانيماز. تاري دان هامي تورك ادبياتي ايچون و خصوصا استاد اسدالله مرداني ايچون كي بيزه چوخ افتخارلارا نصيب ائدميش ساغليق و خوشحالليگ آرزوسو واريم...
بو خبري بوردا دا اوخويونگ http://www.qashqaiturk.blogsky.com/1387/11/11/post-57//